Kontsumobidek zehapen-kanpaina bat jarriko du abian alokairuko etxebizitzen iragarkietan indarrean dagoen informazio-araudia betetzen ez duten higiezinen atarien eta higiezinen agentzien aurka. Erabakia azken hilabeteetan egindako ikuskapen-kanpainaren ondorio da. Kanpaina horretan, kontsumitzaileen eskubideei eta merkatuaren gardentasunari eragiten dieten arau-hauste ugari atzeman dira.
Ikuskapenean 43 webgune aztertu dira, horietatik 40 higiezinen agentzienak eta hiru bitartekaritza-plataforma handirenak. Emaitzen arabera, merkatu tentsionatuko eremuetan kokatutako etxebizitzen iragarki aktiboak zituzten webguneetako batek ere ez zuen betetzen indarrean dagoen araudiak eskatzen duen informazio guztia. Kasu gehienetan, interesdunek alokairuaren benetako baldintzak ezagutzeko ezinbestekoak diren datuak falta ziren.
Antzemandako irregulartasun nagusien artean daude etxebizitza merkatu tentsionatuko eremu batean dagoela ez adieraztea, azken bost urteetan aplikatutako azken errentaren zenbatekoa ez jakinaraztea, alokairuaren erreferentzia-indizeari buruzko informaziorik ez ematea edo maizterrak bere gain hartu beharreko gastu osagarriei buruzko informazio argirik ez eskaintzea.
Kontsumobidek gogorarazi du etxebizitzen publizitateak egiazkoa, nahikoa eta ulerterraza izan behar duela, kontsumitzaileek informazio osoarekin erabakiak hartu eta merkatuan dauden aukerak behar bezala alderatu ahal izateko. Era berean, azpimarratu du higiezinen kudeaketa-gastuak eta kontratua formalizatzeko gastuak etxebizitzaren jabeak ordaindu behar dituela, eta ezin direla maizterrari egotzi.
Zehapen-espedienteak hasi aurretik, Kontsumobidek ikuskapenaren emaitzak Higiezinen Jabetzako Agenteen Elkargoei eta higiezinen atari nagusiei helarazi dizkie, atzemandako gabeziak zuzendu eta legezko betebeharrak bete ditzaten. Horrez gain, sektoreko ordezkariekin bilerak egingo ditu, araudia betetzearen garrantzia azpimarratzeko.
Bestalde, Eusko Jaurlaritzako Etxebizitza eta Hiri Agenda Sailak babes ofizialeko etxebizitzen iragarki batzuk kentzeko eskatu du, ezkutuko gainprezioak antzeman ostean. Jarduketa horren helburua alokairu-merkatua gardenagoa izatea eta kontsumitzaileen babesa indartzea da.