Elikagaien eta edarien ontziek ingurumena kutsatzen duten plastikozko hondakinen artean lehen postuan jarraitzen dute. Hala ondorioztatu du 112 herrialdetan egindako nazioarteko ikerketa batek. Azterlanak hondartzetan, ibaietan, aintziretan eta beste naturagune batzuetan bildutako 1,8 milioi hondakin baino gehiago aztertu ditu. Hondakin ohikoenen artean daude plastikozko botilak, tapoiak, elikagaien bilgarriak, poltsak eta erabilera bakarreko ontziak; horiek guztiek mehatxu larria eragiten diete ekosistemei eta biodibertsitateari.
Ikerketak erakusten du birziklatzea beharrezkoa bada ere, ez dela nahikoa arazoaren tamainari aurre egiteko. Adituen arabera, irtenbiderik eraginkorrena erabilera bakarreko plastikoen kontsumoa murriztea eta berrerabil daitezkeen alternatiben nahiz ingurumen-inpaktu txikiagoa duten ontzien alde egitea da. Gainera, ohartarazten dute hondakin horietako asko mikroplastiko bihurtzen direla; naturan hamarkadetan iraun dezakete eta, azkenean, elikadura-katean sar daitezke.
Kontsumitzaileek funtsezko zeregina dute kontsumo-eredu arduratsuago baterako trantsizioan. Ohitura erraz batzuek, hala nola poltsa berrerabilgarriak erabiltzeak, berriz bete daitezkeen botilak edo edalontziak eramateak, bilgarri gutxiago duten produktuak aukeratzeak, ontzi itzulgarriak edo berrerabilgarriak lehenesteak eta erabilera bakarreko mahai-tresnak edo lastotxoak saihesteak, sortzen diren hondakinak eta kutsadura murrizten laguntzen dute.
Era berean, garrantzitsua da hondakinak behar bezala bereiztea birziklatzea errazteko eta, ahal den neurrian, ontzi birziklagarriak edo material birziklatuekin egindakoak dituzten produktuak aukeratzea. Kontsumo-erabaki horiek ingurumena babesten laguntzeaz gain, enpresak ere irtenbide jasangarriagoak eta ingurumenarekiko errespetutsuagoak garatzera bultzatzen dituzte.
Plastikoaren alferrikako erabilera murriztea administrazioen, enpresen eta herritarren erantzukizun partekatua da. Kontsumo-ohitura jasangarriagoak hartzea da plastikoek eragindako kutsadura gutxitzeko eta ozeanoak, ibaiak eta naturaguneak babesten laguntzeko tresnarik eraginkorrenetako bat.